2018 жылы 10 қазанда Л.Н. Гумилев атындағы Еуразия ұлттық университеті мен «Астана Халықаралық қаржы орталығы» арасында ынтымақтастық туралы Меморандумға қол қойылды.

Аталған рәсім Л.Н. Гумилев атындағы Еуразия ұлттық университетінде екі тарап басшыларының қатысуымен өтті. Меморандумға Л.Н. Гумилев атындағы ЕҰУ ректоры, ҚР ҰҒА академигі Ерлан Сыдықов және «Астана Халықаралық қаржы орталығының» басшысы Қайрат Келімбетов қол қойды.

Шараға ЕҰУ-дің профессор-оқытушылары, факультет декандары, кафедра меңгерушілері қатысты.

Айта кеткен жөн, «Астана Халықаралық қаржы орталығымен» өзара ынтымақтастық жасаудағы басты мақсат - екіжақты келісімге сәйкес бірлескен түрде білім және ғылым саласында жоспарланған іс-шараларды атқару, оның ішінде жаңа цифрлық технологияларды енгізу және оларды дамыту арқылы жаңа заманға сай келетін кадрларды даярлау секілді т.б. бағыттарда жұмыс жүргізілетін болады.

«Астана Халықаралық қаржы орталығының» басшысы Қайрат Келімбетов меморандумға қол қою сәтінде Елбасымыз Н.Ә. Назарбаев 2017 жылы 5 шілдеде «Астана Халықаралық қаржы орталығын» салтанатты жағдайда ашқанын және Қаржы орталығының қазақстандық моделі әлемдік қаржы орталықтарының «ең үздік тәжірибелері» негізге алына отырып құрылғанын атап өтті.

Еуразия ұлтық университетінің ректоры Ерлан Бәтташұлы Сыдықов бұл қол қойылған құжаттың маңыздылығына тоқтала келіп, Қазақстан Республикасының Президенті Нұрсұлтан Әбішұлы Назарбаев Астана халықаралық Қаржы орталығының биржасын іске қосқан сәтте, оған алдымен өңірдегі қаржы хабына, кейіннен Азияның жетекші қаржы құрылымына айналу міндетін жүктегенін тілге тиек етті.

Сондай-ақ Л.Н. Гумилев атындағы Еуразия ұлттық университеті Елбасының бастамасымен құрылған жоғары оқу орын ретінде 22 жылдық тарихы ішінде біршама биік белестерді бағындырғанын, сол жетістіктердің көбі осындай сенімді әрптестермен жасаған ынтымақтастықтың арқасында жүзеге асып жатқанын жеткізді.

Расымен де «Астана Халықаралық қаржы орталығымен» өзара ынтымақтастық туралы Меморандумға қол қою - үлкен ұжым алдындағы келесі бір жауапкершілікті кезеңнің тұрғанын көрсетеді.

«Бұл - ұжымымыз үшін мақтаныш әрі алдымызда тұрған үлкен жауапты міндет. Алдағы уақытта байланысымыз артып, еліміз өркендей берсін!» деп түйіндеді өз сөзін ректор Ерлан Сыдықов.

Баспасөз қызметі