Л.Н. Гумилев атындағы Еуразия ұлттық университетінің «Студенттер үйі» дирекциясының ұйымдастыруымен барлық Студенттер үйінде меңгерушілер, ұйымдастырушы-педагогтар және студенттік кеңес мүшелерінің қатысуымен Қазақстан Республикасының Президенті Н. Назарбаевтың 2018 жылғы 10 қаңтардағы Қазақстан халқына арнаған «Төртінші өнеркәсіптік революция жағдайындағы дамудың жаңа мүмкіндіктері» атты  Жолдауын насихаттау мақсатында кездесулер өткізілді.  

Елбасы айтып өткендей, талқылаудың басы еліміздегі болып жатқан оң өзгерістермен басталып, еліміздің табыстары мен жетістіктерін мақтанышпен айта отырып, индустрияландыру саласын өркендету үшін жүйелі жұмыстар жасалып жатқандығы туралы, конституциялық реформаның жүзеге асырылуы, еліміздің Үшінші жаңғыруын бастағандығын, рухани жаңғыру бағыты бойынша белсенді іс-шаралар жүргізіліп жатқандығы және «Сандық Қазақстан» бағдарламасы қабылданғандығы жайлы студенттерге түсіндірілді.

Жолдауда Қазақстан халқының алдында жүзеге асыратын 10 негізгі міндеттер тұрғаны айқын айтылған.

Бірінші: Қазақстан индустриясы жаңа технологияларды енгізудің көшбасшысына айналуы тиіс.

Екінші: Ресурстық әлеуетті пайдаланудың тиімділігін жақсарту керек.

Үшінші: Агороөнеркәсіп кешенін жаңа технологиялық деңгейге көтеру керек.

Төртінші: Цифрлық технологияларды енгізу мен Интеллектуалды транспорт жүйесін құру.

Бесінші: Құрылыс пен тұрғын үй коммуналдық шаруашылығында заманауи технологияларды қолдану.

Алтыншы: Қаржы секторын «қайта жаңғырту». Банк жүйесін сауықтыру шараларын бақылауды күшейту мен қоса қарапайым азаматтардың мүддесін ескеру тиіс.

Жетінші: Адами капиталдың жаңа сапасы. Мұғалім мамандығының беделін арттыру және денсаулық сақтау саласында жаңа технологияларды қолдану, аурулардың алдын алу мен емдеуді жақсартып, медициналық қызмет көрсетулердің сапасын жоғарылату.

Сегізінші: Тиімді мемлекеттік басқару. Цифрлық технологиялар мемлекеттік қызмет көрсетулер мен мемлекеттік қолдау сапасын жақсартуға, азаматттар сұранысын толығырақ ескеруге мүмкіндік береді. Өңірлердің экономикалық еркіндігі мен жергілікті өзін-өзі басқаруы кеңейтілетін болады.

Тоғызыншы: Заң үстемдігі мен жемқорлықпен күрес мемлекеттік саясаттың басым бағыттары болып қала береді.

Оныншы: «Смарт Сити» технологияларын енгізу.

Өз кезегінде сөз алған №4 Студенттер үйінің студенттік кеңес төрағасы Ж. Дюсилекова: «Елбасының халыққа айтқан 10 негізгі міндеттерін орындау үшін және Қазақстанның жарқын болашағы жолында біз жастар болып, қоғам болып бірлігіміз бен ынтымағымызды арттыруымыз керек» деп студенттерге түсіндірді.

«Елбасымыз айтқандай: «Отанымыздың көркеюі әркімнің жаңа «цифрлық дәуір» талаптарына сай болуына байланысты», сондықтан біз жастар осыны терең түсінуіміз керек», - деді сөз сөйледі №6 Студенттер үйінің студенттік кеңес төрайымы Ж. Мақсатова.

Сондай-ақ, Жолдаудың маңыздылығын талқылай келе, келешекте де студенттер арасында Жолдауды толық насихаттау мақсатында барлық студенттік кеңес мүшелеріне міндеттемелер жүктелді.