Л.Н.Гумилев атындағы Еуразия ұлттық университеті

«Жалпы, Елбасының дәстүрлі Жолдауы әрқашан да тарихи құбылысқа, тарихи құжатқа айналады. Сол құжаттың негізінде әр ұжым өзінің келекшекке деген бағытын анықтап, жұмыс істейді. Биылғы Жолдаудың «Нұрлы жол» деп аталуының себебі – Қазақстанды көркейтудің және алда тұрған қиын кезеңнен, дағдарыс кезеңінен аман-есен алып шығатын амалдарды көрсетіп отыр», - дейді Е.Сыдықов.   

«Биылғы Жолдау алдағы екі-үш жылға арналған іс-шаралардың жол картасы іспетті. Президент әр кезеңді нақты анықтап берді, сол қиын кезеңнен өтетін жолды көрсетті. Және де соның бәрін жай ғана айтып қоймай, сол іс-шараларды қаржыландыру көздерін атап берді. Мысалы, алдағы дағдарыс кезеңіне қосымша 24 млрд доллар бөлініп отыр. Бұл бюджеттен тыс бөлінген қаражат. Оның 9 млрд долларын Елбасы өзі кездесіп жүрген сыртқы инвесторлардан тартуда. Қалған қаражатты Ұлттық қордан алуға мәжбүр болып отырмыз»,-дейді ректор. 

Е.Сыдықовтың айтуынша, бұл жолы Ұлттық қорға «қол салуымыз» үнемі Ұлттық қордың қаражатына жүгінеміз деген сөз емес. Себебі, Ұлттық қорды құрудағы мақсатымыз да сол – қиын кезеңде еліміздегі әлеуметтік бағдарламалар ақсап қалмау үшін керек қаражатты пайдалану. 

«Президент Жолдауында әдеттегідей, білім, ғылым салаларын ұмыт қалдырған жоқ. Индустриялық-инновациялық даму бағдарламасының екінші кезеңіне қажетті мамандарды даярлау үшін 10 базалық университетке 10 млрд теңге бөліп отыр. Бұл қаражат университеттің басқа қажеттіліктеріне емес, сол индустрияландыру бағдарламасын сапалы жүзеге асыратын жоғары білімді мамандар даярлауға бөлінуде»,-деген Е.Сыдықов Еуразия ұлттық университеті бұл ретте құрылыс индустриясына қажетті мамандарды оқытатынын жеткізді. 

«Бұл бағытта бірнеше ұсыныс енгіздік. Құрылыс индустриясына байланысты біздің бағытымыз дұрыс деп танылды. Енді, қаражат бөліне бастайды деген сенімдеміз. Бізде бұрынғы Целиноград құрылыс-инженерия институтының негізі бар. Оның үстіне, Астанада құрылыс қарқынды жүріп жатыр. Сондықтан, біз алдағы уақытта құрылыс индустриясына қажетті мамандарды оқытатын боламыз»,-дейді ректор.

http://bnews.kz/kk/videonews/post/241032/