Үш қала - бір мақсат: тұрақты даму. ЕҰУ GIZ өңірлік сессияларының қорытындысын шығарды

Л.Н. Гумилев атындағы Еуразия ұлттық университетінің Тұрақты даму орталығы климаттың өзгеруіне бейімделу және экологиялық білім беру саласында жоғары оқу орындарының әлеуетін арттыруды мақсат еткен «Климаттың өзгеруіне бейімделу және білім беру» атты оқу бағдарламасын табысты аяқтады. Бағдарлама Халықаралық климат бастамасы (IKI) шеңберінде жүзеге асырылған «Климатты қорғау стратегиялары саласындағы саясат жөніндегі диалог және білімдерді басқару» (DIAPOL-CE) атты Германияның халықаралық ынтымақтастық қоғамы (GIZ) жобасының бөлігі болып табылады.

Бағдарлама бес кездесуді қамтыды — екі онлайн және үш офлайн сессия. Бұл іс-шаралар Қазақстанның жоғары оқу орындары арасындағы тәжірибе, білім және үздік тәжірибелермен алмасудың ауқымды алаңына айналды. Қатысушылар климаттық білім беру мен тұрақты даму бағытындағы өзекті дағдыларды меңгеріп, жоғары оқу орындарында экологиялық тұрақты тәжірибелерді енгізуге бағытталған жобаларды әзірледі.

Офлайн сессиялар үш қалада өтті: 30 қыркүйекте - Астанадағы Л.Н. Гумилев атындағы Еуразия ұлттық университетінде, 6 қазанда - Қарағанды экологиялық мұражайында, және 10 қазанда - Satbayev University (Алматы) базасында. Әрбір кездесу профессорлар, студенттер және сарапшылар арасындағы тікелей пікір алмасуға және тұрақты даму қағидаттарын оқу және зерттеу үдерісіне енгізу жолдарын талқылауға мүмкіндік берді.

Бағдарлама аясында қатысушылар әртүрлі бағыттағы бірқатар инновациялық жобаларды ұсынды:

• Қалалық экодренаж және жасыл инфрақұрылым - жауын суларының ағымын басқаруға және «жылу аралдары» әсерін азайтуға арналған табиғи шешімдер;  
• Экотуризмдегі суды қайта пайдалану - туризм саласында экологиялық технологияларды енгізу;    
• Eco-Nomad 2030 - Қазақстанда тұрақты өмір салтын ілгерілетуге бағытталған білім беру жобасы;     
• Сирек өсімдіктердің ген банкі - биологиялық әралуандылықты сақтау және зерттеу бастамасы;       
• Қалалық биоәралуандылық - «жасыл дәліздер» құру және экологиялық ағартушылықты дамыту;    
• Қозғалыстан энергия - қоғамдық кеңістіктерде энергия өндірудің инновациялық шешімдері.

2025 жылғы 16 қазанда өткен қорытынды онлайн-сессия барысында қатысушылар өз жобаларының соңғы нұсқаларын ұсынды, сарапшылардан ұсыныстар алды және DIAPOL-CE желісі аясындағы одан әрі ынтымақтастық мүмкіндіктерін талқылады.

Бағдарлама климаттық білім беруді дамытуға және Қазақстан жоғары оқу орындарының өзара іс-қимылының жаңа экожүйесін қалыптастыруға серпін берді. ЕҰУ Тұрақты даму орталығы тұрақты болашақ құру жолында университеттер арасындағы әріптестікті кеңейтіп, экологиялық бастамаларды қолдауды жалғастырады.