ЕҰУ студенттері Сингапур мен Вьетнамдағы халықаралық жазғы бағдарламада университет атынан қатысты

Л.Н. Гумилев атындағы Еуразия ұлттық университетінің екі студенті Сингапур мен Вьетнамда өткен төрт апталық ASEAN Summer Programme: Entrepreneurship & Innovation халықаралық жазғы білім беру бағдарламасына қатысты.

Бағдарламада ЕҰУ атынан Раббия Ерғалиқызы - «Шығыстану» білім беру бағдарламасының студенті және Ибрахим Дәлелхан - «Аймақтану» білім беру бағдарламасының студенті қатысты.

Оқу Сингапурдағы Nanyang Technological University (NTU) және Ханойдағы VinUniversity базасында өтті. Бағдарламаның негізгі ұйымдастырушысы NTU болды. Студенттердің қатысуына ЕҰУ қолдау көрсетті: білім алушылар «ENU Students Ambassador» бағдарламасы аясында қаржылық қолдау алды.

Бағдарлама АСЕАН елдері мен басқа мемлекеттердің студенттерін біріктіріп, кәсіпкерлікке, инновацияларға және халықаралық ортада практикалық дағдыларды дамытуға бағытталды. Entrepreneurship & Innovation бағыты аясында қатысушылар кәсіпкерлік үдерісті, кәсіпкерлік ойлауды дамытуды, бизнес-идеяларды құру және дамыту қағидаттарын, сондай-ақ инновациялар мен БҰҰ-ның Тұрақты даму мақсаттарын (SDGs) зерделеді.

Бағдарламада командалық жұмысқа ерекше мән берілді. Студенттер көпмәдениетті және пәнаралық командаларда жұмыс істеп, өзекті жаһандық мәселелерге арналған бизнес-модельдер мен инновациялық шешімдер әзірледі және жобаларының нәтижелерін таныстырды. Оқу бөлімі Design Thinking, Systems Thinking және мәдениетаралық құзыреттер бойынша дәрістер мен практикалық воркшоптарды, сондай-ақ кәсіби және кәсіпкерлік тәжірибесімен бөліскен CEO-лармен және түрлі компания өкілдерімен кездесулерді қамтыды.

Бағдарламаның маңызды бөлігі көшпелі іс-шаралар мен индустриямен танысу болды. Қатысушылар инновациялық және технологиялық компанияларға барып, кәсіпкерлермен, бизнес-көшбасшылармен және сала сарапшыларымен кездесті, компаниялардың тарихын, бизнес-модельдерін және жұмыс істеу қағидаттарын зерделеді.

Бағдарламаның екі елде өтуі академиялық оқуды мәдени алмасумен ұштастыруға мүмкіндік берді. Сингапур мен Вьетнамда студенттер жергілікті мәдениетпен және іскерлік ортаның ерекшеліктерімен танысты. Вьетнамда елдің бизнес-ортасын талдауға және бизнес-модельдерді Вьетнам нарығына шығару стратегияларын әзірлеуге ерекше көңіл бөлінді. Сонымен қатар бағдарлама мәдени іс-шараларды, қалалық турларды және тарихи орындарға баруды қамтыды.

ASEAN Summer Programme бағдарламасына қатысу ЕҰУ студенттеріне Азияның жетекші университеттерінде білім алу тәжірибесін жинақтауға, халықаралық командаларда жұмыс істеуге, кәсіпкерлік және мәдениетаралық құзыреттерін дамытуға, сондай-ақ әртүрлі елдердің студенттерімен және сарапшыларымен жаңа кәсіби әрі жеке байланыстар орнатуға мүмкіндік берді.