ЕҰУ-да «Күміс университет» тыңдаушыларына тоғызқұмалақ бойынша шеберлік сабағы өтті

Л. Н. Гумилев атындағы Еуразия ұлттық университетінде «Тоғызқұмалақ арқылы ұрпақтар диалогы» атты кездесу өтті. Іс-шараны ЕҰУ-дың Үздіксіз білім беру институты мен Дене шынықтыру және спорт кафедрасы «Ұрпақтар диалогы» жобасы аясында ұйымдастырды.

Кездесудің арнайы қонағы — 2026 жылғы VI Дүниежүзілік көшпенділер ойындарында тоғызқұмалақтан Қазақстан Республикасының құрама командасының мүшесі Айдын Жакиев болды. Ол қатысушыларға шеберлік сабағын өткізіп, ұлттық зияткерлік ойынның ерекшеліктері туралы айтып берді және тыңдаушылармен бірнеше партия ойнады.

Кездесуде «Күміс университет» тыңдаушысы Сәуле Баймағанбетованың тәжірибесіне ерекше назар аударылды. Ол бес жылдан бері аға буын өкілдеріне тоғызқұмалақ ойынын үйретіп келеді. Осы уақыт ішінде ұлттық ойын мыңнан астам адамның бос уақытын мазмұнды өткізуінің бір бөлігіне айналды.

«Ең бастысы — олардың көпшілігі ойын тақталарын сатып алып, бүгінде үйде балаларымен және немерелерімен ойнайды. Ұрпақтар сабақтастығы барлық салада маңызды, ал зияткерлік мұраны кейінгі ұрпаққа жеткізуде оның маңызы ерекше», — деп атап өтті Сәуле Баймағанбетова.

Кездесу аясында аға және жас буын өкілдері қатысқан тоғызқұмалақ турнирі өтті.